尸语故事:第一集杰布德曲桑布-江村平措

尸语故事:第一集杰布德曲桑布-江村平措


       རོ་སྒྲུང་།

      སྤྲང་ཆུང་ཟླ་བ་གྲགས་པ་ལ་རྒྱལ་བུ་བདེ་སྤྱོད་བཟང་པོ་ཞེས་མཚན་གསོལ་བ།

      འདིར་སྡུག་རུས་དང་སྙིང་ཁམས་མེད་པ་རྣམས་ཀྱི་དོན་དུ། རྒྱལ་པོ་བདེ་སྤྱོད་བཟང་པོའི་རྣམ་ཐར་འཆད་རྒྱུ་ཡིན་པས་ཚང་མས་སྙན་གསན་པར་ཞུ། དེ་ཡང་གཏམ་རྒྱུད་ཉན་པ་ལ་དམ་ཚིག་རྣམ་པ་གསུམ་བསྲུང་དགོས་ཏེ། ཤེས་ཀྱང་མི་འཆད་པ་མི་བྱེད་པ་དང་གཅིག བར་དུ་མི་ཡེངས་པར་ཉན་པ་དང་གཉིས། ཐ་མ་འཆལ་བར་མི་གཏོང་བ་དང་གསུམ་བསྲུང་དགོས་པ་ཡིན་པས་དེ་ཐུགས་ལ་འཇོག་པར་ཞུ། སྔོན་རྒྱ་གར་ལྷོ་ཕྱོགས་སུ་སྐྱེ་བ་ནས་སྐྱེ་བའི་བར་དུ་པཎྜི་ཏའི་ལུས་རྩེ་གཅིག་ཏུ་ཐོབ་པ། སློབ་དཔོན་ཀླུ་སྒྲུབ་སྙིང་པོ་ཞེས་བྱ་བ་ཞིག ལྷོ་ཕྱོགས་དཔལ་གྱི་རི་བོ་ལ། ལྷ་ཆོས་མི་ཆོས་བསྟན་ཆོས་རྣམས། རྩོམ་གྱིན་བཞུགས་པའི་དུས་སུ་ནི། དེ་ཡང་ཐུགས་བསམ་གཅིག་བཏང་བ་ལ། ང་ལ་སློབ་མ་སྣོད་དང་ལྡན་པ་ཞིག་དགོས་པ་འདུག་དགོངས་ནས་ཐུགས་དམ་ལ་བཞུགས་པའི་དུས་སུ། དགོན་པའི་ལྷོ་ཕྱོགས་དེ་ན་བྲག་གཅིག་ཡོད་པ་དེའི་ལྡེབས་ལ་བྱ་རོག་གི་ཚང་ཞིག་ཡོད་པ་ཡིན་པར་གདའ།  ལུང་པའི་མདའ་ན་རྒྱལ་པོ་གཅིག་ཡོད་པ་དེ་ལ་སྲས་གཅིག་ཡོད་པར་གདའ། དེའི་འཁོར་ན་ཕྱུག་པོའི་བུ་ཞིག་དང་། སྤྲང་པོའི་བུ་རིག་པ་ཅན་གྲུང་པོ་ཞིག་ཀྱང་ཡོད་པར་གདའ། རྒྱལ་པོའི་སྲས་དེས་ཕྱུག་པོའི་བུ་དང་། སྤྲང་པོའི་བུ་གཉིས་ཁྲིད་དེ་ལུང་པའི་ཕུ་ན་ཡར་སྐྱོ་སངས་ལ་ཕྱིན་པ་ཡིན་པར་གདའ། ལྷོ་ཕྱོགས་དཔལ་གྱི་རི་བོའི་རྩེ་ལ་ཡར་ཕེབས་དང་། བྲག་ལྡེབ་དེ་ན་བྱརོག་གི་ཚང་ཞིག་ཡོད་པ་དེ་ན་གཟིགས་ནས་རྡོ་ཐུ་བ་གང་རེ་བསྒྲུབས། བྲག་དེའི་སྒབ་ཏུ་ཕྱིན་ནས་རྒྱལ་པོའི་བུས་ཁོང་གཉིས་ལ་བཀའ་གནང་བར། ངེད་རད་གསུམ་པོ་ཚང་འདི་མ་ཐོན་བར་དུ་ལོག་མི་འགྲོ་བའི་མནའ་བྱེད་གསུངས་པས་ཁོང་གསུམ་པོས་མནའ་རེ་རེ་བསྐྱལ་ལོ། དེར་ཁོང་གསུམ་པོས་བྱ་རོག་གི་ཚང་བརྡུངས་ཤིང་། ཉི་མ་དྲོས་པ་དང་རྒྱལ་པོའི་སྲས་ན་རེ། ཚེ་འདི་ལ་དགོས་པའི་འབངས་འཁོར་ལོངས་སྤྱོད་ནི་ང་ལ་ཡོད། ཕྱི་མ་དགོས་པའི་ཆོས་ཕྱོགས་སུ་སྦྱིན་པ་ནི་སྔར་ཡང་བཏང་། ད་དུང་ཡང་བཏང་བས་ཆོག མནའ་ཁ་འདྲ་ལ་ཁའི་ཤ་བས་ཁྱེར། ང་ནི་ལོག་འགྲོ་ཟེར་ནས་རྒྱལ་པོ་བྱོན་སོང་བ་དང་། སྤྲང་པོའི་བུ་ན་རེ། ང་ནི་སྔར་ཡང་མནའ་ཟོས་ཁྲམ་པའི་ལས་ཀ་བྱེད་མ་མྱོང་། ད་རེས་ཀྱང་མནའ་ཟོས་ན་མི་འགྲིག་ཟེར་ནས་རྡོ་ཐུ་བ་གང་བསྒྲུགས་ཏེ་བརྡུངས་སོ། ཕྱུག་པོའི་བུ་ན་རེ། དབང་ཆེ་བ་ལ་མནའ་དེ་བགག་དོན་མེད་པར་ཁོ་རང་གིས་བཀག བྱོན་དོན་མེད་པར་ཁོ་རང་སྔོན་ལ་བྱོན། ངེད་རང་གཉིས་འདི་མ་ཕོས་བར་སྡོད་ཟེར་ནས་བརྡུངས་སོ། ཉི་མ་ལ་ལ་སོང་ལ་ཁད་ཀྱང་བྱ་རོག་གི་ཚང་འདི་འདྲ་ནི་མི་ཕོས་པར་འདུག མནའ་ཁ་འདྲ་ལ་ཁའི་ཤྭ་བས་ཁྱེར། ཚེ་འདི་ལ་དགོས་པའི་ནོར་ང་ལ་ཡོད། ནོར་ཡོད་ན་མཁས་གྲགས་ནི་ཤུགས་ཀྱིས་འོང་། ལོག་འགྲོ་ཟེར་ནས་ཕྱུག་པོའི་བུ་ཡང་ལོག་སོང་། སྤྲང་པོའི་བུའི་བསམ་པར། ཁོ་ནི་ཕྱུག་པོའི་བུ་ཡིན་པས་སྡུག་མི་ཐེག་ཅིང་། སྤྲང་ཆུང་ཟླ་བ་གྲགས་པ་ང་ནི་ཤི་ན་ཡང་བྱ་རོག་གི་ཚང་འདི་བཏོན་མ་ཚར་བར་མི་འགྲོ་ཟེར་ནས་རྡོ་ཐུ་བ་གང་ཁྱེར་ཏེ་མུ་མཐུད་བརྡུངས་སོ། ས་རུབ་པ་དང་བྱ་རོག་གི་ཚང་ནས་སྒྲུབ་པ་པོ་སྐྲས་དཔུང་པ་ནོན་པ་གཅིག་དོན་བྱུང་ནས་ཁོ་གན་རྐྱལ་དུ་ནམ་ལངས་པ་འདྲ་བ་གཅིག་བརྡབས། ཁ་བུབ་ཏུ་ས་རུབ་པ་འདྲ་བ་གཅིག་བརྡབས་ནས་ཁོ་ལ་སྨྲས་པ། སྤྲང་ཕྲུག་ཆུ་ལ་གསེར་གྱི་མདོག་བྱུང་། བྲག་ལ་འུག་པའི་སྐད་བྱུང་། བྱ་ཚང་ཡོད་རྣམས་ཚོ་ཚང་ལ་འགྲོ། ཚང་མེད་རྣམས་ཚོ་ཚང་འཚོལ་གྱི་འདུག མི་གནས་ཡོད་རྣམས་ཚོ་གནས་ལ་འགྲོ། གནས་མེད་རྣམས་ཚོ་གནས་ཚང་འཚོལ་དུ་སོང་། ལུང་པ་འདི་ན་དབང་རྒྱལ་པོ་ལས་ཆེ་བ་མེད་རུང་ད་ནང་ནས་ལོག་སོང་། ནོར་ལོངས་སྤྱོད་ཕྱུག་པོའི་བུ་ལས་ཆེ་བ་མེད་པ་ལ་ད་གིན་ནས་ལོག་སོང་། མི་མཚམས་ལ་སྡོད་པ་ལགམཚམས་སྒོ་རྡོ་ཡིས་བརྡུངས་ནས་འབུལ་རྒྱུ་དང་སྟེར་རྒྱུ་ཅི་ཡོད་གསུངས་པ་དང་། སྤྲང་པོས་སློབ་དཔོན་ལ་གསོལ་བ། སྒྲུབ་པ་ལ་བཞུགས་ཡོད་འགྲོ་བསམ་པ་མ་བྱུང་། རྒྱལ་པོའི་བུ་དང་ཕྱུག་པོའི་བུ་སྤྲང་པོའི་བུ་བདག་གསུམ་མཐའ་བརྟེན་ནས་བྱ་རོག་གི་ཚང་འདི་མ་ཐོན་གྱི་བར་དུ་མི་འགྲོ་བའི་མནའ་བཞག རྒྱལ་པོའི་སྲས་ནི་འཁོར་དང་ལོངས་སྤྱོད་དཔའ་འཛོམས་པ་ཡིན་པས་མནའ་མི་བརྩིས་པར་གཤེགས་སོང་། ཕྱུག་པོའི་བུ་ཡང་ནོར་ལོངས་སྤྱོད་འཛོམས་པས་མནའ་ལ་མི་བརྩིས་པར་ལོག་སོང་། བདག་ནི་དབུལ་པོའི་བུ་ཞིག་ཡིན་སྟབས་ང་ལ་ལོངས་སྤྱོད་མེད་པས་འབུལ་རྒྱུ་ག་ལ་ཡོང་། མནའ་ལ་འཛེམས་ནས་བྱ་རོག་ཚང་འདི་བརྡུངས་པ་ལགས་ཞུས་པ་དང་། སློབ་དཔོན་གྱི་ཐུགས་དགོངས་ལ། འདི་ནི་སྐྱེ་ས་དཔོན་དང་ཕྱུག་པོ་མིན་རུང་ཤེས་རབ་ཆེ་བས་དཀའ་བ་སྤྱོད་ནུས་པ་གཅིག་ཡོང་བ་འདྲ་དགོངས་ནས། ཁྱོད་ལ་ཕ་མ་ཡོད་དམ་གསུངས་པ་དང་། ཕ་མ་ཡོད་ན་བསོད་ནམས་བསགས་པ་ཡིན། ལག་ན་ནོར་ཡོད་ན་དབུལ་པོའི་མིང་ཡང་མེད། བསོད་ནམས་ཀྱི་ཀྱུ་ཧུད་ད་གིན་ནས་ཞུས་པ་ལྟར་ལགས་ཞུས་པས། དེར་བླ་མས་ཕྱག་ཕྱི་ལ་ཁྲིད་ནས་ལྷོ་ཕྱོགས་དཔལ་གྱི་རི་ལ་བྱོན་ནོ། དེའི་ཚེ་དེའི་དུས་ན་རྒྱ་གར་ལྷོ་ཕྱོགས་དཔལ་གྱི་རིར་དུར་ཁྲོད་ཆེན་པོ་གཅིག་ཡོད་པའི་མཐའ་ལ་རོ་བྲན་མང་པོས་བསྐོར་ཅིང་། དེའི་དཀྱིལ་ན་རོ་རྒན་དངོས་གྲུབ་རྒྱ་མཚོ་ཞེས་བྱ་བ། རོ་དེའི་ཁ་ནས་གཏམ་སྨྲ་མཁས་པ་ཞིག་ཡོད་པ་དེ་ལ་གཏམ་ལན་མ་ཤོར་བར་ལོན་ན་ལྷོ་ཕྱོགས་དཔལ་གྱི་རི་ལ་གསེར་ཁ་ཆེན་པོ་ཞིག་བྱུང་ནས་འགྲོ་དོན་ལ་ཕན་པ་ཞིག་ཡོང་རྒྱུ་ཡིན་པས། དེ་ལེན་པར་སྤྲང་ཆུང་ཟླ་བ་གྲགས་པ་ལ་རྒྱལ་བུ་བདེ་སྤྱོད་བཟང་པོའི་མཚན་གསོལ། དྲ་བ་དང་། རལ་གྲི། ཏོག་མ། ཞགས་པ་དང་བཅས་པ་གྲ་སྒྲིག རྒྱལ་བུ་ལ་སློབ་དཔོན་གྱིས་སྨོན་ལམ་བཏབ། དུས་ཚེས་བཟང་པོ་ལ་རབ་གནས་མཛད་དེ།  བླ་མས་འདི་སྐད་གསུངས། རྒྱལ་བུ་བདེ་སྤྱོད་བཟང་པོ་ཁྱོད། དཀའ་སྤྱད་དང་ཞེ་རུས་བསྐྱེད་ནས་རོ་ཁོ་རང་གིས་གང་ཟེར་ཡང་གཏམ་ལན་མ་བྱས་པར་ཤོག བླ་བྲང་འདིའི་ཕྱོགས་བཞིར་མཚམས་ཐོ་རེ་རེ་ཡོད། སྔ་མ་ཕྱིན་འཕྲལ་ལ་རོ་ལོན་ན་མཚམས་ཐོ་བརྒལ་ནས་ཤོག དེ་ནས་རོ་ལ་གཏམ་ལན་ཤོར་བ་བྱུང་ན་ཞག་པོ་བདུན་ལ་མར་ཟན་འདི་ཡིས་ཐུབ། དེ་ནས་མ་ལོངས་ན་ཤར་གྱི་མཚམས་ཐོའི་རྩར་ཤོག ཞག་བདུན་ཐུབ་པའི་མར་ཟན་གཅིག་དེར་ཡོང་། རོའི་པུས་མོ་མན་ཆད་གསེར་དུ་མི་འགྱུར་རོ། ཞེ་རུས་མ་བསྐྱེད་ན་གསེར་ཁ་མི་ཡོང་བས། ངས་ཀྱང་དམིགས་པ་དང་སྒྲུབ་པ་རིམ་ལ་བྱའོ། ཁྱོད་ཀྱིས་ཀྱང་ཞེ་རུས་རིམ་ལ་སྐྱེད་ཅིག འགྲོ་དོན་ལ་ཕན་ཐོགས་ངེས་ཀྱི་གསེར་ཁ་ཡོང་བ་ཞིག་ངེས་པར་བྱ་དགོས་སོ་གསུངས། ཡང་ཐུགས་དགོངས་གཅིག་བཏང་བ་དང་། དེ་ནས་ཡང་ཞག་བདུན་གྱི་བར་རོ་དེ་མ་ལོན་ན་མཚམས་ཐོ་བརྒལ་ནས་ཡོང་བའི་དཔེ་ཡོད་དགོངས་ནས་ཉིན་བདུན་དང་བཅུ་བཞིའི་བར་ལ་རོ་མ་ལོན་ན་ལྷོ་སྒོའི་མཚམས་ཐོའི་འོག་ལ་ཤོག ཐོ་ལ་གསལ་པའི་ཡི་གེ་བཏབ་ནས་ཡོད། རྒྱབ་ཏུ་རོ་འཁུར་རྒྱུ་མེད་པར་མཚམས་ཐོ་བརྒལ་ནས་ཡོང་དང་མི་ཡོང་མེད་དོ། ཞེ་རུས་སྐྱེད་ཅིག་གསུངས་ནས་སློབ་དཔོན་ནང་དུ་བྱོན་ནོ། དེ་ནས་རྒྱལ་བུ་བདེ་སྤྱོད་བཟང་པོ་དེས་དྲ་བ་གཅིག ཏོག་མ་གཅིག རལ་གྲི་གཅིག ཞགས་པ་གཅིག འཛའ་ར་མར་ཟན་རྐྱལ་པ་ཆེན་པོ་གཅིག་བཅས་ཁུར་ཏེ་དུར་ཁྲོད་ཆེན་པོ་དེར་བྱོན་ནོ། །